Rev 4 | KMG | STEP | No wiac i hone manac efârerâ šâŋe firâ mi sambâŋko motâc moc aaŋ domame honezepac i¡ Ehame dâŋ qanaŋ qeŋfânâŋ tinac manapo, ijaha mocwâc fuarâ šiŋuc nazawec: “Go šira wefutec juku wiac fuaocmu gaza gowatuc epe honec.”

Revelation of John 4

Johanezi Anuture ŋeŋe honewec â mumuteŋ gae manawec

1 No wiac i hone manac efârerâ šâŋe firâ mi sambâŋko motâc moc aaŋ domame honezepac i¡ Ehame dâŋ qanaŋ qeŋfânâŋ tinac manapo, ijaha mocwâc fuarâ šiŋuc nazawec: “Go šira wefutec juku wiac fuaocmu gaza gowatuc epe honec.” 2 Iŋuc mume izia maŋnane ŋerisieme sambâŋko eri ŋeŋe moc ŋehame fainao moczi ŋeme honepo. 3 Á eri ŋeŋeo ŋewec e hawarine ârâŋ ɋârizi bâbâroŋ findowakicne, â ŋeŋe botâŋnao huriri somâckerâ domawec, hawarine buge iŋucne erâ jawaririŋ kikicne. 4 Erâ eri ŋeŋe sâko rârec rârec eri ŋeŋe gâcne 24 ŋerawec. Ŋeŋe irec faio ŋicqizec 24 ŋerambiŋ. Jaŋe ŋaqi qaŋqaŋ sasawa roŋembiŋ â eridu golzi-bakicne qizec-jeŋicko ŋerawec. 5 Erâ eri ŋeŋe sâkoonec bâbâric â ɋuŋ parandaŋ fuahuc fowec, â eri ŋeŋe mainao šocbâruŋ 7 šawec, i Anuture mâro 7 jaŋere šoc. 6 Erâ wâc eri ŋeŋe maio ine hâwec kiruŋzi bakicne tinac jawaririŋ kikicne fowec.

Erâ eri ŋeŋe maŋfuŋnao wiac jujune 4 ŋerambiŋ, jaŋe bu râpe-jeŋicko šâŋehec sasawa. 7 Moc e laioŋ hawari iŋucne, moc e bulimakao ŋicne hawari iŋucne, moc e šâŋe maine ŋic hawari iŋucne, moc ine tucwipe fahareekac hawari iŋucne. 8 Wiac jujune 4 jaŋe fakec-jeŋic 6 sasawa, erâ fakec-jeŋic faine â juwicne šâŋe-jeŋic jaha fowec. Erâ ŋafe furec wirahuc šiŋuc mueŋgopieŋ:

“Wofuŋ Anutu bapafâre, e tiri, tiri, tiri jaha,
juweczi jukac erâ wâc wareocmu.”
9 Eme wiac jujune 4 jaŋe eri ŋeŋeo ŋeekac, juju sanaŋ rune hâcne, e daŋge mumuteŋ â šeri bubiaŋ ecnepie sâc 10 ŋicqizec 24 jaŋe, eri ŋeŋeo ŋeekac, juju sanaŋ rune hâcne, ere maŋfuŋko fodaperâ mu šeri ecnehuc ŋeŋefuŋ-ticnao eridu-jeŋic ŋerâ šiŋuc mueŋgopieŋ:

11 “Wofuŋ-nâŋec Anutu,
eri qaraweŋ â šâŋe biŋe â tâpiri
i goki raucketec sâcke-hâmokac,
goki hâcne wiac sasawa bâfuameŋ,
â gore micte wiac fua-fârewec fokac.”